Robótica, Visión artificial

Produtividade, rapidez, calidade, fiabilidade, repetitividade, flexibilidade. Estas son só algunhas das vantaxes que achega a utilización de robots industriais nos procesos produtivos.

Non serve calquera robot para calquera aplicación nin todas as aplicacións son robotizables dunha forma sinxela. En Syspro estudamos as necesidades dos clientes e a viabilidade das aplicacións que hai que robotizar, asesorándoos e propoñendo a mellor solución en cada caso.

Deseñamos e construímos aplicacións robotizadas completas, “chave na man”, ou ben, introducimos os cambios e as melloras necesarias en aplicacións xa existentes para adaptalas a novos requirimentos ou para mellorar o seu funcionamento.

Dispoñemos de robots das principais marcas nas nosas instalacións para realizar probas ou demostracións.

Asegurar a calidade na fabricación de calquera produto é unha das maiores necesidades de todos os nosos clientes e poder lograr este reto con independencia de factores como a fatiga, distraccións, descoidos ou equivocacións, proporciónalles unha enorme tranquilidade. Por iso, en Syspro estudamos e deseñamos solucións mediante visión artificial, que permiten a detección de múltiples tipos de defectos en produtos e a toma de decisións, tales como a expulsión dos produtos defectuosos da liña de produción.

O control de trazabilidade mediante a lectura de diferentes tipos de códigos impresos ou perforados pode ser efectuado co uso de lectores, pero en ocasións é necesario utilizar cámaras de visión artificial.

Outro dos usos da visión artificial é a localización e orientación de produtos cando estes non veñen perfectamente colocados en posicións concretas e determinadas. A utilización da visión artificial permite a manipulación de produtos con robots ou a guía destes para actuar sobre as zonas desexadas, sen necesidade de deseñar e fabricar caras e complexas ferramentas ou sistemas de posicionamento.

Dispoñemos dun laboratorio equipado con distintos sistemas de visión artificial, de iluminación e tecnoloxías complementarias (TOF, Termografía, etc.)  para realizar probas, estudos de viabilidade de aplicacións e demostracións.